كلمة سعيد عقل في جامعة اللويزة

 

5 نيسان 2000

أبتي الرئيس، صديقي الأب يمّين، خَلِيني إثني كلمة الأستاذ مطر، إنو الجامعة هَوْن بْتِسْمَعْ كلْ الناس وبتريد كل واحد يعطي رأيو حتى هوي يحترملنا رأينا، أنا كتير بأيِّد كلام مطر بهالنِقطة وبـِعْتبرو بِـِمَـثــِّـلْ هالجامعة إللي إلي شَرَفْ الانتماء إليها (تصفيق). إنتو يا أصدقائي أمام كتاب جديد، عنوانو نفسو غريب، وأنا بَسْ وصلي هالكتاب كمان استغربت، المسيح خِلِق بلبنان ما خِلِق ببيت لحم اليهودية البعيدة كتير عن لبنان، أنا مِتِلكن استغربت وقـْعِدت إقرا بهالكتاب، أنا بقرا بالسِنة شي أربعين كتاب لاهوت، ومتطلع على آخر الآراء باللاهوت سواء اللي بيكتبوها الروم بالمناطق الغميقة بالقضايا الرومانية متل موسكو، متل ما بقرا عنـّا وكتب بتطلع بالمناطق الأوروبية الغربية. يعني أنا متطلع عا كل الآراء.

 

أول شي قريت هالكتاب بتلات جلسات. كِنت ناطر انو هالكتاب أول ما بدو يـِصْدمْـلي معتقدي بَدِّي وَقفو، كتاب 700 صفحة حطـّيت براسي رَحْ اوْصَل عالصفحة 30 عالصفحة 40 رح أوصل لشي يزعجلي إيماني إتركو، لأ الكتاب صارْ يشدني وبتلات جلسات بالنهار وبالليل قريتو كـلوْ، أول مرة بقرا كتاب 700 صفحة بـ 24 ساعة، طبعاً كان في وقت بَيناتهن. يعني كنت متل إللي عم ينتقدو بدي إنتقدو لهالزلمي وما بتأثر أنا بالصداقات. فيّ أشخاص بيحبوني ما بآمن بأفكارُنْ، وفي أشخاص ضِدْ أفكاري وبَسْ إقرالن شي حِلو بقِلـُنْ هَوْ منيح، إنتو أمام شي جديد بدو يوقف بوج ألفي سنة، أفْ لازم نِنـْتِـبه وقت إللي بيطلع شي جديد، بيطلع بوج ألفي سنة، بدو يكون عِنا احترام كبير للحقيقة لنقول خلينا نسمعو للآخر هالزلمي. وأنا ما بتصور الكنيسة الكاتوليكية يعني التابعة للبابا وأنا منها، أنا ماروني ما بعتقد انو بـ24 ساعة رَحْ تاخد بآراء جايي جديدة.

 

فبدكن تتوقعوا إنو هالأمر بدو ياخد وينعطى فيه. بقلكن هالحقيقة الإنجيل كتابنا وأنا ماروني بفهم باللاهوت بقلكن الحرف فيه مش هيدا المسيح، يعني نِحْنا منقرا الكتاب تـَبَعْنا، خلافا لما بيقرا المسلم القرآن وأنا بحترم كل مسلم، المسلم بقلك القرآن مكتوب بالسما معناتا حرفو بمثل الله. نحنا بالإنجيل منحترم رأي المسلم شو بيقول بدك تحترملو رأيو، أما نحنا مِنقول حتى الكلمات حتى الجو إللي نـْكتبت فيه هالكلمات ما نحنا معها. الإنجيل مش كتاب تاريخي أبدا أوعكن تتصورو، الإنجيل يشهد إنو إللي نِـزل من السما هيدا الله بس المسائل الحرفية التاريخية لأ، بيقدر هالخوري يطلع ضدّها، بيقدر البابا يطلع ضدها، عَمْ إعطيكم شي بالعقيدة الكنسية. رَحْ بعطي متل تا تفهمو هالنقطة. الإنجيل عن لسان المسيح "كونو كاملين كأبيكم الذي في السماوات". أنا بتصور انو هالكلام كتبو هالإنجيلي وْهُوي عرفان أنو بدن يقرو اليونان، هالكلام مكتوب بإنجيل إنكتب باليوناني. اليونان ما بيآمنو إنو الإله هُوّي بيخلق من ما شي. "زوس" عند اليونان ما بيعمل من ما شي، بياخد شي وبيعمل متلو وأحسن، بياخد شي موجود، أما من العدم ما بيآمن اليوناني. أنا بتصور وبقدر إشرح إنو المسيح قال: "كونو خلاقين كأبيكم الخلاق". هاي اليوناني بينزعج منها، وبتصوَّر يكون المسيح قال: " كونو خلاقين كأبيكم الخلاق". الإنجيلي إللي سمعا مِنو، رح يقول: "هاي يا عمي أبتركبش براسي". وشرحها "كونو كاملين"، ما وصل يقول: "كونو خلاقين". هيدا عم بعطيكن هالكلام تا قلكن قدَّيْْـش المسيحي روم وكاتوليك وبروتستانت بيآمنو إنو الإنجيل مش بدنا ناخدو بالحرف.

وهالكتاب إللي جايبو الأب ..هيدا آخر طبعة. هيدا كل سنتين تلاتة بيطبعو اليسوعية وبيحتو شروح، إذا كانو قايلين بهالكتاب إنو بيت لحم تعمرت قبل المسيح بـِحْويلا 300 سنة. يا عمي كيف بدا تكون هالبيت لحم إللي خلق فيا داود إللي خلق قبل بألف سنة، إذا هالخوري جايب كتاب آخر طبعة من طبعات اليسوعية، هاو بـِـيـعْدو بيحققو، لا هُوّي بيفزع ولا أنا بفزع من هالأمر. الإنجيل مش مكتوب حرفيا لـَنِفهَمو حرفيا. متلا إذا أخدنا مار بولس، أنا كنت زغير ومش قوي باللاهوت خَمِّن مار بولس شي "ميزوجيني" يعني ضد المرا، اليوم أنا مار بولس بحبو كتير وبعلمو. بيقول: "المرا مِشْ لازم تطل شايلي عن راسا الغطا يعني المنديل. كنت إنزعج من مار بولس، اليوم بشرحو وبلاقي هالكلمتين بيمثلوني 100%، كانت المرا بي إيام مار بولس إللي مش مغطايي بمنديل يعتبروها فلتاني، اليوم لأ صارت الموضة تطلع وشايلي عن راسها، كل البنات الموجودين قدامي ما حدا حاطت عا راسو شي. فكان قاصد مار بولس يومتا إنو المرا الفلتاني أبحبهاش، مش قاصد انو المرا اللي حاطـَّهْ عا راسا يعني بهالحرف ما بدنا ناخدو عالحرف، انو المرا ما كانت تحكي بالمجتمع بيومتا لأنو المرا ما كانت مثقفة حتى عند اليونان مش بس عنـّا بالشرق، مين إللي بيحكي، المرا الفلتاني، إللي بـِتـْبَلـِّش تحكي وما بتعرف شي بـِتـْبَلـِّش تشعلب وتحكي. قلها مار بولس لأ ما تحكيش.

أما اليوم صرت إفهم مار بولس وكل البنات اللي بيدرسو عندي بقلن قرو مار بولس هيدا بيفهم وغميق كتير، بعد المسيح أنا بحب مار بولس. وهالكلمتين المرا ما تطلع بلا شي عا راسها وما تحكي بهالمجتمع قـَصَدْ إنو المرا إلْ مِشْ مثقفي مِتل الرجال شو لازم تحكي بالمجتمع بتصير تـْزَعْوِتْ، عنا كلمة باللبناني " تـْزَعْوِتْ" مزبزطة هايْ. بدي شَدِدْ عا هالنقطة هايْ إنو المسيحية تعتبر إنو الإنجيل مكتوب من وحي الروح القدس ولكن كلماتو والجو إللي محطوطة فيه مش هيدا الجو المطلق إللي بَدو ياهْ المسيح، الكنيسة بتشرح فيه ألفين سنة شرح.

 

هالخوري المحترم بْذكِـركـُنْ إنـّو هيدا إبن الـ"Physique" وأنا من العِلم بحب العُلوم وبقول إنو العِلم هوي قصيدة قصايد القرن العشرين (تصفيق) هالزلمي ابن عِلم الفيزيا، وأنا عِلمين بحبهن كتير عِلم الفلك، بقرالي 10 أو 15 كتاب من عِلم الفلك متخصصين، وعِلم الفيزيا، بقرالي 10 أو 15 كتاب من عِلم الفيزيا كل سنة، هالرجل إبن باريس بدكتوراه بالفيزيك وقريتلو كتابو وأنا براسي: "أوعا يا بونا يمّين تكون عم بتخون الدرب إللي تشددت فيها وإنت عم تدرس فيزيك". قلتلو ياه بهالمسؤولية، إنت عالِم بالأول وجيت عاللاهوت، بهالدقة وبهالمسؤولية. ما تستهونو هالخوري مش حَيَلا بَطرك بيقدر يرد عا هالخوري (تصفيق).

 

نحنا جامعة هون قوية كتير ببعض الفروع متل الـ"Genie" يعني الهندسة ونحنا بي هالجامعة قوايا بالـ"Mathématiques". ما تستهونونا نحنا هون بدن يقرو كتاب هالخوري Mathématiciens ومهندسين مش بس لاهوتيين وفلاسفة، هالخوري راضيكن ما تستهونوْ. لما بياخد كتاب قديم اليسوعية طابعينو ما بتلاقو فيه بيت لحم تانية على الإطلاق. هالخوري مِطـّلع وما إنتبهو كتير وقتها اللي جايب آخر طبعة من هالكتاب الكتاب المقدس طبعة اليسوعيي هاي بينْحَتْ عليها "لا مانع من طبعه".

 

هالكتاب هيدا بيستشهد فيه هالخوري ما تستهونوه، هيدا أحدث طبعة لليسوعية وإذا قالت وين تعمّرت بيت لحم، عم بتقول الحقيقة إجا الخوري إتكل عليها قال بدي فتش، فيْ بيت لحم تانية؟، لِقي إنو في بيت لحم عنا ولقي انو هالبيت لحم هاي إللي ولد فيا المسيح. ولو فيْ ألفين سنة قالت غير شكل، هيدا من العِلم، أنا قريتلو كتابو وأنا كمان متلو ابن الـ Physique وأنا متلو ابن علم الفلك لأنو هَوْ عِلمين أنا بحبن بين العُلوم، بْحِبْ يللي صدمكن هالكتاب بحبكن تشعرو انو مش بـ24 ساعة رح تقولو إللي عم بيقولو لأنو هُوي وقت إللي إهتدى لهالأفكار هالخوري العظيم وقت إللي إهتدى لهالأفكار هُوّي ناقش حالو قال أنا بدي إطلع ضد ألفين سنة بدي شوف كنـّو معي حق أو لأ، أنا إنسان محترم ببلادي ما حدا قال إني مهرطق على بلادي أنا بدي شوف إذا بقدر احكي هالكلام، العظيم هوي إللي بيحاكم حالو قبل ما يطلع للناس، السطحي بيروح بزت حَيَلا فكرة بْتِطلع براسو. أنا ما بزت حَيَلا فكرة بتطلع براسي بحاكما بمسؤولية قبل ما اكتبا.

 

بريدكن، يَـللي صدمكن رأسا ً عنوان هالكتاب، بقلكن خللي يضل صادمكن وقرولي هالكتاب بمسؤولية الواحد يخلـّي يْضل صادمو. رح بغملكن القضية: المسيح إنسان خلق متلنا متلو بيجوع، جاع مرة راح شاف التينة إللي بدو ياكل منها لقاها ما فيهاش تين، هيدا إلـّي صَلـَبو قالت المسيحية هيدا الله، الإسلام ما فهمها، هيدا الله؟، كيف الله زلمي بيتوجع، بياكل وبيجوع الله؟ نحنا منآمن إنو المسيح هوي الله بالذات، هيدا مش بنهار وبنهارين منقدر نـْدَخْـلو بعقول الآخرين إنما في ألفي سنة من الثقافة، ألفي سنة وراها أوروبا العظيمة اللي هي ثقافة الأرض. لما الياباني بيتثقف يعني بيعرف أوروبا، لما الأميركي بيتثقف يعني بيعرف أوروبا ولما إبن أفريقيا بيتثقف يعني بيعرف أوروبا، أوروبا إلها ألفين سنة بتقول هيدا الزلمي المعتر إللي إنضرب وإنصلب هيدا الله، إي هيدي مش رح تدخل بتكـْـتـَيْن وتلاتة. بألفين سنة تا صار مليار وربع، مليار ونص بالعالم بيقول هيك.

 

بحياتكن قرولي هالكتاب مع كل الصعوبات اللي براسكن، أنا بتصور إنو مطارينا وبطاركتنا رح يقرو هالكتاب لأنو هالخوري آخد إحتياطات وكل المسائل إللي بدو ينرد عليها مهيألا حواشي وكلمات ولا أقوى من هيك ومستند إلى عظام معو كمان فخليكن بهالتشدد لأنو بدو يـِمْرَق كم سنة أخد وعطا بهالكتاب وبدنا نطلع بهالكم سنة آخدين راس أو معو حق أو ما معو حق. أما إذا سألتوني أنا بمسؤولية لاهوتية بعرفها وبمسؤولية عِلمية، أنا هالكتاب صدمني وكتبت عنـّو أجمل مقال بحياتي.

• التالي

المجموعة: ما كُتِب حول كتاب المسيح ولد في لبنان لا في اليهودية